Ísland fellur um sex sæti í samkeppnisvísitölu

Ísland er nú í 31. sæti í samkeppnisvísitölu Alþjóðaefnahagsráðsins (World Economic Forum) 2010-2011 en var í 26. sæti fyrir ári síðan. Samkeppnishæfnivísitalan byggir á opinberum upplýsingum og könnun sem gerð er meðal stjórnenda í atvinnulífinu.

Nýsköpunarmiðstöð Íslands er samstarfsaðili Alþjóðaefnahagsráðsins á Íslandi og framkvæmdaraðili könnunar.

Í tilkynningu segir að vísitala Alþjóðaefnahagsráðsins um samkeppnishæfni er virtur mælikvarði á efnahagslíf þjóða víða um heim. Vísitalan er víðtæk og endurspeglar þá þætti sem segja til um framleiðni þjóða og vaxtarmöguleika. Sviss heldur efsta sætinu milli ára sem samkeppnishæfasta landið en síðan koma Svíþjóð og Singapúr. Sérstaka athygli vekur að Bandaríkin láta undan og eru núna í fjórða sæti listans.+

Síðastliðin tvö ár hefur Ísland fallið um ellefu sæti eða úr því að vera í 20. sæti árið 2008 í 31. sæti árið 2010. Alls taka 139 þjóðríki þátt í könnun Alþjóðaefnahagsráðsins og er samkeppnihæfni þjóða metin út frá styrk eða veikleika í tólf mismunandi þáttum. Í skýrslu ráðsins The Global Competitiveness Report 2010-2011, sem kemur út í dag, er meðal annars fjallað um stöðu Íslands. Skýrsluhöfundar segja að meginorsök að baki falli Íslands sé áframhaldandi hnignun efnahagsumhverfisins (úr 56. sæti í 138. sæti) og veikari fjármálamarkaður (úr 20. sæti í 122. sæti).

Þrátt fyrir þessar niðurstöður þætti þá stendur Ísland mjög vel í öðrum sterkum samkeppnisþáttum sem líklegir eru til að færa landið hraðar í átt að stöðugra og samkeppnishæfara efnahagskerfi. Þar má nefna samkeppnishæfni á lykilsviðum eins og menntun, þróun, tækni og nýsköpun.

Menntakerfi Íslands er í fremstu röð á öllum stigum (4. sæti í menntun heilbrigðisstétta og grunnskólamenntun og 6. sæti í menntun á háskólastigi og fagþjálfun), atvinnulífið er framsækið (17. sæti) og aðlögunarhæfni að tækninýjungum sem auka framleiðslugetu mikil (4. sæti). Sveigjanlegur vinnumarkaður (7. sæti) kemur atvinnulífinu ennfremur til góða sem og sterkir innviðir samfélagsins (12. sæti).

Í niðurstöðunum kemur meðal annars fram að Kínverska alþýðulýðveldið heldur áfram að klífa upp listann og greinilegar eru framfarir í mörgum öðrum ríkjum í Asíu. Þýskaland færist upp um tvö sæti, í það fimmta, og er efst evrulandanna.

Um fall Bandaríkjanna segja skýrsluhöfundar að við ójafnvægi í efnahagskerfinu hafi bæði opinberar stofnanir og stofnanir í einkageiranum veikst, auk þess sem menn hafa haft viðvarandi áhyggjur af ástandi fjármálamarkaðanna. Norrænu ríkin halda góðri stöðu sinni á listanum, Svíþjóð, Finnland og Danmörk eru meðal tíu efstu og Noregur vermir 14. sætið.