Tónlist.is tilbúinn fyrir Android-símaflóðið

Baráttan um snjallsímamarkaðinn er í algleymi þessi misserin og hefur það komið mörgum á óvart hversu styrkri stöðu Google hefur náð á markaðnum á skömmum tíma með Android-stýrikerfinu.

Tónlistarvefurinn Tónlist.is hefur ekki farið varhluta af þessarri þróun og eru menn þar á bæ nú búnir að uppfæra þjónustuna þannig að hún henti fyrir þá síma sem keyra á Android-stýrikerfinu. Þessi þjónusta, eða svokallað App, kemur beint í kjölfar þess að Tónlist.is gerði þjónustuna aðgengilega fyrir iPhone og iPad. Er því smám saman verið að búa í haginn fyrir áframhald snjallsíma- og smátækjavæðingarinnar.

„Þeir sem eru í áskrift á Tónlist.is geta streymt tónlist hvar og hvenær sem er í gegnum Android-símtæki. Áskrifendur hafa nú aðgang að milljónum laga, bæði íslenskum sem og erlendum í gegnum Android farsíma sinn. Þeir geta þannig hlustað á alla lagalista sem þeir hafa búið til á vefnum, skoðað vinsælustu lögin, séð hvað er nýtt eða einfaldlega leitað að því sem þeir vilja hlusta á," segir í tilkynningu.

Nánari upplýsingar um hvernig þjónustan er sett upp er hægt að finna hér á Tónlist.is.