Sigurjón Sighvatsson opnar vinnufataverslunina Vír

„Við erum að leita aftur til uppruna fyrirtækisins með að opna vinnufatabúð fyrir almenning," segir Sigurjón Sighvatsson, kvikmyndaframleiðandi og eigandi 66 gráður norður en hann er staddur hér á landi til að undirbúa nýja búð sem nefnist Vír og opnar að Grensásvegi 8 í vikunni.

„Síðan ég kom inn í fyrirtækið fyrir sex árum hefur verið meiri áhersla lögð á útivistarfatnað en vinnufatnað en gamla Sjóklæðagerðin var alltaf í miklum viðskiptum við vinnufatagerðina Vír og þess vegna má segja að við séum að leita til fortíðarinnar með að opnun þessarar búðar," segir Sigurjón en hann þess fullviss að almenningur taki vinnufataverslun af þessu tagi fagnandi.

„Það er ekki mikið úrval á landinu af fatnaði sem er bæði tískuvara og vönduð vinnuföt. Smiðir eiga að geta farið í sömu buxunum í vinnuna og á barinn en það er svona hugmyndin á bak við búðina," segir Sigurjón en hann er nýkominn til landsins frá Ástralíu þar sem hann var að klára tökur á sinni nýjustu mynd sem ber nafnið The Killer Elite og skartar stjörnuleikurunum Jason Statham, Robert De Niro og Clive Owen í aðalhlutverkum.

„Þetta gekk tíðindalítið fyrir sig sem þýðir í þessum bransa að allt gekk vel. Það var gríðarlega gaman að vera gera svona alvöru spennumynd," segir Sigurjón en myndin verður frumsýnd á næsta ári. -áp