Verðbólguvæntingar stjórnenda lækka nokkuð

Verðbólguvæntingar stjórnenda hjá stærstu fyrirtækjum landsins hafa lækkað nokkuð undanfarið samkvæmt könnun sem Capacent Gallup gerði fyrir Seðlabankann í september síðastliðnum.

Fjallað er um málið í Morgunkorni greiningar Íslandsbanka. Þar segir að þannig gerðu forsvarsmenn fyrirtækja ráð fyrir að verðbólga næstu tólf mánaða yrði 2,5%, eða í verðbólgumarkmiði Seðlabankans. Á sama tíma fyrir ári bjuggust þeir við að árstaktur verðbólgu yrði 4%.

Það að stjórnendur vænti nú minni verðbólgu kemur ekki á óvart enda í takti við þá þróun sem verið hefur og horfur eru um. Nú í nóvember mældist verðbólgan 2,6% og hefur hún ekki verið minni síðan í apríl 2004. „Jafnframt teljum við og aðrir sem gera opinberar verðbólguspár að verðbólgan verði hófleg næstu misserin og spáum við t.d. 2,3% hækkun vísitölu neysluverðs yfir næsta ár," segir í Morgunkorninu.

Verðbólguálag á skuldabréfamarkaði hefur einnig lækkað verulega frá því í fyrra en álagið endurspeglar að hluta verðbólguvæntingar fjárfesta, þó ýmsir fleiri þættir spili þar inn í. Nú þegar þetta er ritað (kl. 09:30) stendur álagið í 1,4% til þriggja ára og í 2,5% til níu ára. Á sama tíma í fyrra var verðbólguálagið til þriggja ára 2,9% en til níu ára 4,0%.