Krónubréfum skipt út fyrir skuldabréf í erlendri mynt

Gylfi Magnússon efnahags- og viðskiptaráðherra segir að gert sé ráð fyrir að eigendum skammtímafjármagns verði að lokum boðið að skipta á krónubréfum og skuldabréfum í erlendum gjaldmiðlum í útboði. Líklega eru eigendur krónubréfanna í mörgum tilvikum fyrrverandi eigendur jöklabréfa.

Þetta kemur fram í svari Gylfa Magnússonar við fyrirspurn Ásbjörns Óttarssonar þingmanns Sjálfstæðisflokksins um jöklabréf og gjaldeyrishöft. Ásbjörn spurði m.a. hvernig ráðherrann hyggðist beita sér fyrir því að leysa málefni tengd jöklabréfum þannig að hægt verði að losa um gjaldeyrishöftin?

„Það eru raunar engin mál útistandandi varðandi svokölluð jöklabréf, þ.e. skuldabréf sem gefin voru út erlendis af erlendum aðilum og að mestu leyti seld erlendum fjárfestum. Fyrrnefndar innstæður erlendra aðila eru hins vegar afsprengi útgáfu svokallaðra jöklabréfa," segir í svari Gylfa Magnússonar.

„Í áætlun Seðlabankans um afnám haftanna, sem birt var sl. sumar, er gert ráð fyrir því að hömlum verði aflétt fyrst á ákveðnum flokkum langtímaskuldabréfa. Gera má ráð fyrir að innan tíðar verði ákveðnir flokkar langtímaskuldabréfa að mestu leyti komnir í eigu innlendra fagfjárfesta eða erlendra langtímafjárfesta (nýfjárfesting hefur nú þegar verið heimiluð).

Að því gefnu að Icesave-deilan verði til lykta leidd og þar af leiðandi nægur gjaldeyrisforði til staðar ætti því að vera hægt að leysa höft af fjármagnshreyfingum tengdum viðskiptum með langtímaskuldabréf tiltölulega fljótlega. Næstu skref þar á eftir munu ráðast af því hvernig til tekst um fyrsta skrefið, en gert er ráð fyrir að eigendum skammtímafjármagns (sem líklega eru í mörgum tilvikum fyrrverandi eigendur jöklabréfa) verði að lokum boðið að skipta á krónubréfum og skuldabréfum í erlendum gjaldmiðlum í útboði."

Ásbjörn spurði einnig hvort gjaldeyrishöftin hafi komið í veg fyrir greiðslur úr landi vegna jöklabréfa sem eru komin á gjalddaga?