Samtök fjárfesta eiga hundruð milljóna í sjóði

„Félagsmönnum hefur ekki fækkað þrátt fyrir hrunið. Í síðasta félagatali voru þeir um fimmtán hundruð. Færri þeirra eiga nú hlutabréf," segir Vilhjálmur Bjarnason, framkvæmdastjóri Samtaka fjárfesta. Samtökin halda almennan fund í dag þar sem fjallað verður um nokkur dómsmál sem gengið hafa að undanförnu, svo sem gegn Glitni og Straumi.

Vilhjálmur segir samtökin hafa komið vel undan efnahagshruninu. Þau keyptu hlutabréf í Verðbréfaþingi í kringum 1995, höfðu arð af fjárfestingunni og fengu dágóða summu þegar sænska kauphallarsamstæðan OMX tók þá íslensku yfir árið 2007. Söluandvirðið var í sænskum krónum. Það hefur frá upphafi legið inni á reikningi, nemur nú sjö hundruð milljónum króna og lýtur bæði stjórn samtakanna og viðskiptaráðuneytis. Einu tekjur sjóðsins eru vextir á reikningnum. Fé úr sjóðnum er nýtt til rekstrar samtakanna og er Vilhjálmur eini launaði starfsmaður þeirra. Eina eign samtakanna til viðbótar eru hlutabréf í Kauphöllinni upp á um sextíu milljónir króna.

Ekki eru greidd félagsgjöld í Samtökum fjárfesta. Vilhjálmur segir það hafa verið reynt síðast fyrir um fjórum árum. Vilhjálmur segir innheimtuna hafa verið dýra og því ákveðið að fella hana niður þegar söluandvirðið skilaði sér á sínum tíma. - jab