Skoða skaðabótamál vegna ástarbréfa seðlabankastjóra

Sú ákvörðun slitastjórnar Sparisjóðabankans (áður Icebank) að hafna kröfum Seðlabankans í búið vegur þungt í athugun sérstaks starfshóps á því hvort ríkið geti sótt skaðabætur til fyrrverandi seðlabankastjóra vegna fjárhagstjóns sem þeir ollu ríkinu.

Seðlabankinn krafði þrotabú Sparisjóðabankans um þá rúmlega 200 milljarða króna sem Sparisjóðabankinn fékk að láni hjá Seðlabankanum til að lána áfram stóru viðskiptabönkunum þremur.

Slitastjórnin hafnaði kröfunni með þeim rökum að Seðlabankinn hefði vitað að viðskiptabankarnir stefndu í þrot, lánveitingarnar hefðu verið málamyndagjörningur og að þær hefðu ekki uppfyllt öll skilyrði laga. Seðlabankinn hefur andmælt þessari afstöðu og ef ekki semst um niðurstöðu kemur málið til kasta dómstóla.

Starfshópur fjögurra ráðuneyta hefur unnið að athugun á möguleikum ríkisins á að reka skaðabótamál á hendur þeim sem sýna má fram á að hafi valdið ríkinu og almenningi fjárhagslegu tjóni með athöfnum sínum í aðdraganda bankahrunsins.

Samkvæmt heimildum Fréttablaðsins ýtti ákvörðun slitastjórnarinnar við athugun á ástar­bréfaviðskiptum Seðlabankans enda fælist í rökstuðningi að þeir er um véluðu hefðu gert alvarleg mistök í starfi. Öndverð niðurstaða slitastjórnar hefði, að sama skapi, dregið úr líkum á málsókn. Fari málið fyrir dóm mun niðurstaða hans ráða miklu um framhaldið.

Lán Seðlabankans til Kaupþings, með veði í danska FIH bankanum, var einnig undir smásjá starfshópsins. Nýgengin sala á bankanum er Seðlabankanum mjög til hagsbóta og áhrif lánveitingarinnar á fjárhag ríkisins því ekki lengur til skoðunar.

Icesave-reikningar Landsbankans hafa líka verið til sérstakrar athugunar. Samkvæmt upplýsingum blaðsins er grannt fylgst með heimtum í bú bankans og hvort eignir þess muni standa undir kostnaði vegna Icesave. Ákvörðun um málsókn verður að líkindum ekki tekin fyrr en endanlegt uppgjör liggur fyrir. - bþs