Boðar endurkomu Íslands á alþjóðlegan skuldabréfamarkað

Steingrímur J. Sigfússon fjármálaráðherra segir að unnið sé að því að undirbúa komu Íslands á alþjóðlegan skuldabréfamarkað. Aðspurður um hvort ríkisstjórnin myndi gefa út skuldabréf á þessu markaði á næstunni svarar Steingrímur því að ..."við erum að undirbúa þetta skref."

Orðin lét Steingrímur falla í viðtali við þýska blaðið Frankfurter Allgemeine Zeitung. Ummælin hafa vakið nokkra athygli, Reuters hefur tekið málið upp sem og breskir fjölmiðlar.

Fram kemur í máli Steingríms að hluti af undirbúningnum felist í að hefja afnám gjaldeyrishaftanna auk þess að íslensk stjórnvöld haldi áfram að vinna að því að auka trúverðugleika sinn í alþjóðlegum fjármálaheimi og að auka stöðugleika efnahagslífsins heimafyrir.

Steingrímur segir að traust á fjárhagsstöðu íslenskra fyrirtækja sé að koma aftur..."þannig að ríkið mun líka koma aftur á fjármálamarkaðinn," segir hann.

Aðspurður um Icesave deiluna í þessu samhengi neitar Steingrímur að tjá sig um það mál, segir það viðkvæmt.