Skilar óendurskoðuðum reikningum

Eignarhaldsfélagið Akurey, sem er í eigu Kristjáns Jóhannssonar, stjórnarmanns í Arion banka, og konu hans, skilaði ársreikningum fyrir árin 2007 og 2008 í byrjun júlí síðastliðinn. Ársreikningarnir hafa ekki verið endurskoðaðir.

Fréttablaðið sagði frá því í sumar að Akurey, sem stofnuð var árið 2007 og á stóran hlut í lyfjafyrirtækinu Icepharma í gegnum dótturfélag sitt, hefði aldrei skilað ársreikningi. Þrátt fyrir það væri eigandi þess, stjórnarformaður og prókúruhafi, Kristján Jóhannsson, lektor í viðskiptafræði við Háskóla Íslands og sæti sem fulltrúi Bankasýslu ríkisins í stjórn Arion banka.

Inntur eftir svörum við því hvers vegna reikningunum hefði ekki verið skilað sagði Kristján að handvömm hlyti að hafa valdið því. Hann kæmi af fjöllum og myndi ganga í það hið fyrsta að koma reikningunum til skila.

Reikningunum var síðan skilað 7. júlí, sama dag og frétt birtist í Fréttablaðinu um að þeir hefðu enn ekki borist ársreikningaskrá.

Fram kemur í ársreikningunum að endurskoðunarfyrirtækið PricewaterhouseCoopers hafi aðstoðað við gerð þeirra og yfirfarið þá, en þeir hafi hins vegar ekki verið endurskoðaðir og sannreyndir. - sh