Friðlýsa Jan Mayen en setja um leið milljarða í olíuleit

Friðlýsingin þýðir að Jan Mayen verður verndað friðland sem og hafsvæðið umhverfis eyna innan tólf mílna landhelgi. Undanþegin vernd verða þó svæði í kringum veðurathugunarstöð og flugbraut. Þá kemur friðlýsingin ekki í veg fyrir fiskveiðar né olíuleit í efnahagslögsögu Jan Mayen utan tólf mílna.

Tilkynning um friðlýsingu Jan Mayen ber þess merki að vera friðþæging gagnvart andstæðingum frekari olíuleitar á norðurslóðum innan norsku ríkisstjórnarflokkanna því að á sama tíma var tilkynnt um að verulegum fjárhæðum yrði varið næstu tvö árin til að undirbúa olíuleit á hafsvæðum norðan heimskautsbaugs, og eru Jan Mayen og Barentshaf sérstaklega nefnd í norskum fjölmiðlum í því sambandi. Norska ríkisstjórnin hyggst þannig verja samtals 180 milljónum norskra króna á árunum 2011 og 2012 til rannsókna í því skyni að undirbúa olíuboranir í norðurhöfum.

Í friðlýsingu Jan Mayen felst að ekki verður leyft að byggja þar þjónustumiðstöðvar vegna fyrirhugaðrar olíuleitar. Olíuleitarfélög sem hyggjast freista gæfunnar á Jan Mayen-hryggnum munu því væntanlega ekki hafa annan kost betri en íslenskar hafnir. Þannig gæti friðlýsingin leitt til þess að íslenskar hafnir þurfi ekki aðeins að þjónusta olíuleit á íslenska hluta hryggjarins, sem Íslendingar hafa nefnt Drekasvæðið, heldur einnig að þjónusta leitina á norska hlutanum.