Skertur síldarkvóti þýðir 11 milljarða tap fyrir útgerðir

Tekjutap útgerða af niðurskurði á kvóta úr Norsk- íslensku síldinni, sem ákveðinn var í gær, nemur röskum ellefu milljörðum króna á næsta ári.

Þetta tap bætist við þriggja og hálfs milljarðs króna tekjutap vegna niðruskurðar á kolmunnakvótanum, sem ákveðinn var fyrir nokkrum dögum.

Síldarkvótinn verður skertur úr 215 þúsund tonnum niður í 143 þúsund tonn, eða um 72 þúsund tonn. Skerðingin ein er talsvert meiri en allur kvótinn á íslensku sumargotssíldinni var í fyrra.

Uppsjávarflotinn, sem veiðir síld, kolmunna, makríl og loðnu, verður því af 17 milljarða króna tekjum á næsta ári.