Nýir eigendur að Ölgerðinni

Auður I  fagfjárfestasjóður ásamt meðfjárfestum leggja til nýtt hlutafé og eignast 36% í Ölgerðinni.  Í tilkynningu segir að samhliða muni Arion banki eignast 20% í félaginu og Andri Þór Guðmundsson, forstjóri og Októ Einarsson, stjórnarformaður ásamt fjórum  framkvæmdastjórum Ölgerðarinnar eiga 44% í félaginu eftir endurskipulagningu.

Þá segir að eftir gengishrun íslensku krónunnar hafi skuldsetning fyrirtækisins verið orðin veruleg byrði á annars góðum rekstri. „Þrátt fyrir að öll lán hafi verið í skilum var eigið fé neikvætt og hófu stjórnendur því viðræður við Arion banka um fjárhagslega endurskipulagningu og skuldbreytingu erlendra lána. Niðurstaða þessara viðræðna eru að samhliða inngreiðslu nýs hlutafjár munu skuldir félagsins lækka úr 9,5 milljörðum í rúma 7,2 milljarða króna og Arion banki eignast 20% hlut í félaginu."

Arna Harðardóttir, framkvæmdastjóri AUÐAR I fagfjárfestasjóðs, segir að sjóðurinn sjái mikil verðmæti í Ölgerðinni sem skipar sterkan sess í hugum íslenskra neytenda eftir nærri 100 ára samfylgd. „Undanfarin ár hefur Ölgerðin náð miklum árangri og sterkri markaðsstöðu. Við sjáum tækifæri í áframhaldandi öflugri vöruþróun og markaðssókn á öllum sviðum starfseminnar. Það skiptir sköpum fyrir endurreisn íslensks efnahagslífs að fyrirtæki eins og Ölgerðin geti haldið áfram starfsemi af fullum krafti og þurfi ekki að eyða frekari tíma og orku í úrlausn þess mikla vanda sem hrunið olli."

Andri Þór Guðmundsson, forstjóri Ölgerðarinnar segir ánægjulegt fyrir starfsmenn að óvissunni sé lokið og að nú sé horft björtum augum til framtíðar með öfluga nýja hluthafa um borð. „Hjá Ölgerðinni starfar samheldinn og duglegur hópur starfsfólks sem hefur staðið vaktina í gegnum erfiða tíma og mun gera það áfram."