Kostnaður vegna leik- og grunnskólanema mestur á Íslandi

Heildarkostnaður á Íslandi vegna leik- og grunnskólanema , sem hlutfall af landsframleiðslu, er sá langmesti í samanburði við önnur OECD lönd.

Þetta kemur fram í árlegri skýrslu OECD um menntamál meðal aðildarþjóða samtakanna. Þar segir að á Íslandi eru jafnframt einna fæst börn á hvern starfsmann leikskóla og Íslendingar eru með fæsta nemendur á hvern kennara í grunnskólum árið 2008, eða aðeins 10 á meðan meðaltal OECD landanna er 16,4.

Fjallað er um málið á vefsíðu Sambands íslenskra sveitarfélaga. Þar kemur fram að af OECD þjóðum eru einna fæstir nemendur í hverjum bekk hérlendis eða 18. Aðeins Luxemborg er með færri nemendur í bekk.

Hvað varðar þróun kostnaðar á 7 ára tímabili frá árunum 2000-2007 kemur í ljós að hann hækkar um 45% á leik-, grunn- og framhaldsskólastigi á sama tíma og nemendum fjölgar um 7%.