Rösklega 740 þúsund litrar af áfengi seldust fyrir helgi

Sala áfengis var svipuð fyrir verslunarmannahelgina núna og fyrir ári síðan. Samtals seldust 743 þúsund lítrar af áfengi í vikunni fyrir verslunarmannahelgi nú í ár en í sömu viku í fyrra seldust 750 þúsund lítrar. Samdrátturinn í lítrum talið nemur því 0,9%. Um 0,5% færri viðskiptavinir komu í Vínbúðirnar þessa viku en sömu viku í fyrra, 124 þúsund á móti 125 þúsund.

Ef einstakir dagar í vikunni eru bornir saman má sjá að fleiri viðskiptavinir komu í Vínbúðirnar þriðjudag, miðvikudag og föstudag en í fyrra. Einnig má sjá að 1,2% fleiri viðskiptavinir komu í Vínbúðirnar á föstudeginum í ár en í fyrra. Föstudagurinn fyrir verslunarmannahelgi er venjulega einn annasamasti dagur ársins í Vínbúðunum og síðastliðinn föstudagur var þar engin undantekning. Þá komu 43.800 viðskiptavinir í Vínbúðirnar en 43.300 heimsóttu Vínbúðirnar sama dag fyrir ári.

Í Vínbúðinni í Vestmannaeyjum komu um 2.688 viðskiptavinir föstudag og laugardag um verslunarmannahelgi í fyrra, en í ár heimsóttu um 2.570 viðskiptavinir Vínbúðina. Fækkunin er því 4,4% á milli ára. Á Akureyri komu um 4.426 viðskiptavinir sömu daga fyrir ári en 4.848 í ár og er aukningin milli ára því um 9,5%.