Nýir eigendur Straums reikna með 47% endurheimtum

Hinir nýju eigendur Straums reikna með að endurheimtur þeirra úr þrotabúi bankans muni nema um 47% sem þýðir að þeir reikna með að fá rúmlega 90 milljarða króna til baka.

Fjallað er um málið á vefsíðu Financial Times. Þetta er aðeins hærra hlutfall á endurheimtum en markaðurinn hefur reiknað með en skuldabréf Straums höfðu gengið kaupum og sölum á 40% af nafnverði undanfarna mánuði.

Eins og fram hefur komið í fréttum hafa kröfuhafa tekið við eigum Straums fjárfestingarbanka af skilanefnd bankans. Á fréttavefnum Financial Times kemur fram að þessi atburðarrás gæti sett fordæmi fyrir slitameðferð stóru bankana þrjá sem féllu í október 2008.

„Viðbrögðin frá erlendum lánadrottnum hafa verið þau að þetta sé góður samningur og mikilvægt skref í endurskipulagningu bankanna frá bankahruni," sagði Dean Merritt, ráðgjafi Straums, í samtali við Financial Times.

Hér eftir munu helstu kröfuhafar bankans, sem áttu 1,3 milljarða evra, eða tæplega 200 milljarða kr., kröfur í bankann fara með eigur hans. Þarna er átt við fjárfestingasjóðina Davidson Kempner og Varde Partners og austurríska bankann RZB. Straumur mun hér eftir verða að fullu í eigu þeirra.