Verðtrygging óhagstæðari en elstu gengislán frá 2004

Eftir leiðréttingu höfuðstóls og breytingu yfir í krónulán munu gengistryggðu bílalánin vera 1 til 13 prósent dýrari en verðtryggt krónulán sem tekið var á sama tíma.

Þetta á þó ekki við um fyrstu gengislánin sem boðin voru íslenskum neytendum með sjö ára lánstíma á árinu 2004. Þau eru þremur til sjö prósentum ódýrari en verðtryggt lán frá sama tíma, ef lántakendur hafa ekki nýtt sér úrræði til að fá greiðslur frystar eða lánstíma lengdan.

Þetta kemur fram í útreikningum sem Haraldur Ólafsson, forstöðumaður verkefna- og þjónustusviðs SP, hefur látið Fréttablaðinu í té. Hann segir þessar upplýsingar sýna að ef gengið verður lengra í að koma til móts við viðskiptavini með gengistryggð lán fari gengistryggðu lánin að verða hagstæðari en verðtryggð lán í íslenskum krónum. Slíkt væri ósanngjarnt gagnvart þeim sem tóku verðtryggð lán af því að þeir vissu um áhættuna sem fólst í gengistryggðum lánum og ákváðu að taka hana ekki.

Félagsmálaráðherra hefur kynnt lagafrumvarp, sem bíður meðferðar á Alþingi og gengur út á að fjármálafyrirtækjum verði skylt að lækka lánin og breyta yfir í lán í íslenskum krónum frá upphafsdegi. Eftir breytingu í krónur fá lánin 15 prósent álag til að vega upp vaxtamun, þar sem mun lægri vextir hafa verið greiddir af gengislánum. SP-Fjármögnun segir að sú aðferð sem fyrirtækið er nú að bjóða sé sambærilegt við aðferð frumvarpsins. SP hyggst bjóða þeim sem skipta í krónur 7,95% vexti á breytt verðtryggð lán en 12,6 prósent á breytt óverðtryggð lán. Önnur fjármögnunarfyrirtæki munu bíða með frekari aðgerðir þar til afgreiðslu mála á Alþingi og fyrir Hæstarétti er lokið en rétturinn mun senn dæma um tvö mál þar sem tekist er á um lögmæti gengistryggðra lána.

Um 15.000 manns eru með gengistryggð bílalán hjá SP. Hið venjulega lán er 2,5 milljónir og var tekið um mitt ár 2006, segir Haraldur. Haraldur segir að yfir 1.000 viðskiptavinir hafi sótt um höfuðstólslækkun, eða rúmlega 200 á dag að jafnaði.

peturg@frettabladid.is