Telur Lýsingu hafa brotið lög

Neytendastofa telur að ákvæði bílasamnings, sem Lýsing gerði við bifreiðakaupanda, um vexti láns, bæði íslenskan og erlendan hluta þess, brjóti gegn lögum um neytendalán og lögum um óréttmæta viðskiptahætti. Í úrskurði Neytendastofu, sem birtur var í gær, segir jafnframt að Lýsing verði að bera ábyrgð á því að félagið hafi fyrir mistök ekki greint frá því á samningi að íslenskur hluti lánsins væri verðtryggður.

Bifreiðakaupandinn kvartaði til Neytendastofu þann 21. október í fyrra. Athugasemdir hans sneru að því að upplýsingar um lánakjör samningsins við Lýsingu með tilliti til eftirstöðva, vaxta og annars lántökukostnaðar væru mjög óskýrar. Ómögulegt sé fyrir leigutaka að reikna út eða sjá fyrir með hvaða hætti leigugjald geti breyst og hvernig uppreikna skuli höfuðstól.