Seðlabankinn líklega sáttur við núverandi stöðu krónunnar

Líklegt er að seðlabankinn sé nokkuð sáttur við núverandi stöðu krónunnar, að hún sveiflist á þröngu bili á gildum sem tryggja góðan afgang af viðskiptum með vörur og þjónustu við útlönd.

Þetta kemur fram í Markaðsfréttum Íslenskra verðbréfa. Þar segir að áhugavert er að velta fyrir sér hver viðbrögð Seðlabankans yrðu ef aðstæður þróuðust á þann veg að krónan ætti að styrkjast.

Þær aðstæður gætu t.d. verið verulegt innflæði vegna stórframkvæmda, farsæl lausn í ICESAVE deilunni eða árangursrík lántaka ríkissjóðs erlendis. Myndi Seðlabankinn láta krónuna styrkjast eða færi hann í frekari kaup á gjaldeyri og koma þar með í veg fyrir styrkinguna? Kaupin má auðveldlega rökstyðja á þann hátt að Seðlabankinn væri að styrkja þann hluta gjaldeyrisforðans sem ekki er tekinn að láni.

Krónan veiktist í síðustu viku og hækkaði gengisvísitalan um 0,33% og endaði í 207,37. Undanfarnar vikur hefur krónan heldur verið að veikjast, en 6. september var hennar sterkasta gildi á árinu, 204,74. Veikingin er að vísu mjög óveruleg og er nær að tala um stefnulausa gengisþróun eða flata gengisþróun.