Heiðar Már: Viðskiptavinirnir grunlausir um áhættu

Heiðar Már Guðjónsson, fjárfestir og fyrrverandi framkvæmdastjóri Novators, segir í minnisblaði sem hann kynnti fyrir bankaráði Landsbankans og Björgólfi Thor Björgólfssyni í ársbyrjun 2006 að viðskiptavinir bankanna séu almennt grunlausir og hafi lítið hugsað út í áhættuna sem fylgi því að krónan veikist.

Heiðar Már Guðjónsson, fjárfestir og fyrrverandi framkvæmdastjóri Novators, sendi mönnum í bankaráði Landsbankans minnisblað um stöðuna á íslenskum fjármálamarkaði þann 17. janúar 2006. Í minnisblaðinu segir að spenna á íslenskum fjármálamarkaði sé gríðarleg og leiðrétting óhjákvæmileg. Heiðar Már fer yfir þróunina sem orðið hafði á íslenska fjármálamarkaðnum frá árinu 2000 og segist ekki hafa fundið alþjóðleg dæmi um samsvarandi útþenslu.

Heiðar Már segir að viðskiptavinir bankanna hafi lítið hugsað út í áhættuna sem fylgir því að krónan veikist um 30%, en það sé raunveruleg áhætta. Þá hafi viðskiptavinir bankanna, lántakendur, ekki hugsað út í að vextir í erlendri mynt hækki. Hann segir að viðskiptavinir séu almennt grunlausir og hafi ekki hugsað út í að hafa „cash flow" til að mæta lánagreiðslum.

Heiðar Már segir í minnisblaðinu að íslenskur lánamarkaður geri ráð fyrir endalausri hagsæld, áframhaldandi sterkri krónu og miklum og jákvæðum umsvifum á hlutabréfamarkaði.