Spáði að bankahrun yrði 2007

Heiðar Már Guðjónsson, fjárfestir og fyrrverandi framkvæmdastjóri Novators spáði fyrir um það árið 2006 að bankarnir gætu ekki fjármagnað sig árið 2007.

Í minnisblaði sem hann sendi lykilmönnum í Landsbankanum og Björgólfi Thor í maí 2006 og fréttastofa hefur undir höndum segir hann:

"Lánsfjárþörf bankanna fyrir þetta ár hefur verið fullnægt. Næsta ár lítur hins vegar tvöfalt verr út en áður sökum uppsagna á USD bréfum. Það ár þurfa bankarnir væntanlega að fjármagna sig fyrir 5-6 milljarða evra, sem mun ekki takast."

Í sama minnisblaði segir Heiðar Már að hlutabréfamarkaðurinn á Íslandi eigi eftir að lækka mun meira og aðgangur að lánsfé þrengjast frekar. Þá spáði Heiðar Már gengisfalli krónunnar.