Vonir um írska björgun sefar óttann á mörkuðum

Auknar vonir um að Írar muni þiggja neyðaraðstoð frá ESB og Alþjóðagjaldeyrissjóðnum (AGS) hafa sefað ótta fjárfesta á mörkuðum í Evrópu. Hlutabréfavísitölur í Bretlandi og Þýskalandi eru á uppleið og skuldatryggingaálagið á Írland er á niðurleið, raunar komið undir 500 punkta samkvæmt mælingu CMA gagnaveitunnar.

Sendinefnd embættismanna frá ESB, evrópska seðlabankanum (ECB) og AGS komu til Dublin í dag. Þeir ætla að kanna stöðuna í írska bankageiranum og væntanlega hefja samningaviðræður við írsk stjórnvöld um neyðaraðstoðina.

Í frétt um málið á Bloomberg-fréttaveitunni segir að Patrick Honohan seðlabankastjóri Írlands hefur fyrstur írskra ráðamanna viðurkennt að neyðaraðstoðarinnar sé þörf. Það gerði hann í morgun en írsk stjórnvöld hafa hingað til þverskallast við að þiggja aðstoð frá ESB og AGS.

Orð Honohan hafa öðrum frekar leitt til þess að ótti fjárfesta hefur dvínað og samhliða því fara vextir á írsk ríkisskuldabréf nú lækkandi, eru komnir undir 8% það sem af er degi. Honohan telur að lánin sem Írland fái frá ESB og AGS muni verða á um 5% vöxtum.