Bætur skertar og álögur auknar

Bætur ýmis konar verða skertar og álögur á bifreiðar, áfengi og tóbak og fleira verða auknar í fjárlögum næsta árs. Kaupmáttur ráðstöfunartekna heimilanna mun lækka um hálft prósent vegna þessa

Fjármálaráðherra mælti fyrir frumvarpi til ráðstafana í ríkisfjármálum í dag, en þar er gert ráð fyrir að tekjur ríkissjóðs á næsta ári aukist um 11 milljarða króna með lækkun bóta eins og vaxta- og barnabóta og með gjöldum ýmis konar. Tekjuskattur einstaklinga og virðisaukasktattur hækka ekki.

Dæmi um ráðstafanir til að auka tekjur eru:

- Vörugjald á áfengi og tóbak hækkar um 600 milljónir

- Vörugjald á áfengi og tóbak í fríhöfnum 300 milljónir

- Fjármagnstekjuskattur á einstaklinga hækkar úr 18 í 20% og skilar 1,5 milljarði

- Erfðafjárskattur hækkar úr 5 í 10 % og skilar 1 milljarði

- Kolefnisgjald hækkar og skilar 1 milljarði

- Lækkun barnabóta skilar 1,3 milljörðum

Tekjutenging barnabóta verður aukin þannig að þeir tekjuhærri fá minni eða engar bætur. Lækkun vaxtabóta skilar 270 milljónum.

Tekjutengin vaxtabóta verður einnig aukin og reiknaðar vaxtabætur almennt lækkaðar um 8 prósent. Þá verða bensín- og olíugjöld hækkuð til samræmis við verðlag sem og ýmsir aðrir svo kallaðir krónutöluskattar, eins og útvarpsgjald sem hækkar úr 17.200 krónum á ári í 17.900 krónur.



Ekki búið að útfæra lækkun fæðingarorlofs

Lækkun framlaga til Fæðingarorlofssjóðs skilar einum milljarði. Ekki er búið að útfæra hvernig lækkun fæðingarorlofs verður framkvæmd. Þá munu bætur almannatrygginga ekki hækka með verðlagi sem spari ríkissjóði 183 milljónir króna á ári.

Auknar heimildir til úttektar séreignarsparnaðar á næsta ári munu svo gefa ríkissjóði þrjá milljarða í skatttekjur. Samtals aukast tekjur ríkissjóðs með þessum aðgerðum um 11 milljarða milli ára og metur fjármálaráðuneytið að þessar hækkanir muni lækka ráðstöfunartekjur heimilanna að meðaltali um 0,5 prósent á næsta ári.

Mun tvímælalaust skila sér

Fjármálaráðherra segir að nú greiði ríkissjóður 15-17 prósent af öllum tekjum sínum í vexti. Með þessu fjárlagafrumvarpi séu erfiðustu áfangarnir að baki. Mikilvægt sé að ná skuldunum niður og koma jafnvægi á ríkisbúskapinn

„Það mun tvímælalaust skila sér til baka á komandi árum í traustari forsendum ríkisbúskaparins, minni vaxtakostnaði og betri hagvaxtarforsendum ef við náum hratt tökum á fjármunum hins opinbera. Það sýnir reynsla allra sem hafa gengi í gegnum þessa hluti," segir Steingrímur J. Sigfússon, fjármálaráðherra.