Róbert Wessman opnar einkasjúkrahús

Félag í eigu Róbert Wessman opnar einkasjúkrahús á gamla hersjúkrahúsinu að Ásbrú á næsta ári, en endurbætur á húsinu hefjast í mars. Sjúklingarnir verða sóttir til útlanda í liðskipta- og offituaðgerðir. Allt að 300 störf munu skapast í Reykjanesbæ, segir bæjarstjóri.

Þróunarfélag Keflavíkurflugvallar byrjar á umfangsmiklum endurbótum á gamla hersjúkrahúsinu í Reykjanesbæ eftir nokkrar vikur. Iceland Healthcare, sem er í eigu Róberts Wessman, mun síðan leigja það undir sjúkrahús fyrir útlendinga. Stefnt er að því að starfsemin hefjist 2011, en á spítalanum verða gerðar liðskipta- og offituaðgerðir.

Eftir endurbætur verða á sjúkrahúsinu 3 skurðstofur, 35 legurými og gert er ráð fyrir þúsund sjúklingum fyrsta starfsárið.

Iceland Healthcare telur að sóknarfæri séu í auknum biðlistum eftir aðgerðum af þessu tagi í nágrannalöndunum. Einnig er stefnt að markaðssetningu í Bretlandi og Bandaríkjunum.

Gera menn ráð fyrir að sjúklingarnir dvelji hér á landi að jafnaði í tvær vikur eftir aðgerð, í endurhæfingu. Ættingjar og aðstandendur þeirra fylgi væntanlega með.

Tekjur eru áætlaðar þrír og hálfur milljarður á ári.