Hæsta krafan í Kaupþing nemur 200 milljörðum

Í tilkynningu frá slitastjórn Kaupþings segir að sex mánaða frestur til að lýsa kröfum í Kaupþing banka rann út 30. desember sl. Í dag hafa 23.000 kröfur verið skráðar en slitastjórn Kaupþings áætlar að í heild hafi borist um 27- 29.000 kröfur innan kröfulýsingarfrestsins.

Slitastjórn ráðgerir að ljúka skráningu á næstunni og birta kröfuskrá á vefsvæði fyrir kröfuhafa 22. janúar næstkomandi. Kröfuskráin verður einnig aðgengileg kröfuhöfum á skrifstofu slitastjórnar að Borgartúni 26. Fundur verður haldinn með kröfuhöfum 29. janúar á Hilton Hotel Nordica þar sem kröfuskráin og afstaða slitastjórnar til lýstra krafna, að svo miklu leyti sem hún liggur fyrir, verður til umræðu.

Á síðustu vikum hafa allt að 30 manns unnið fyrir slitastjórn Kaupþings við móttöku, skráningu og yfirferð krafna. Lægsta krafan sem þegar hefur verið skráð er að fjárhæð 250 krónur (lægri en 2 evrur) en sú hæsta sem skráð hefur verið hljóðar upp á um 200 milljarða króna. Af þeim kröfum sem þegar hafa verið skráðar hafa flestar borist frá Þýskalandi en alls hafa skráðar kröfur í bankann borist frá 111 löndum, að því er segir í tilkynningunni.