Tíu aðilar hafa gert tilboð í Haga

Tíu aðilar, bæði innlendir og erlendir, hafa gert tilboð í smásöluverslanarisann Haga sem er í söluferli hjá Arion banka. Forstjóri Haga nýtur enn trausts til að gegna starfinu þrátt fyrir svimandi háa sekt vegna samkeppnislagabrota.

Arion banki heldur utan um 99,5 prósenta hlut í smásöluverslanarisanum Högum, en fyrirtækið er nú söluferli. Tíu óskuldbindandi tilboð bárust í kjölfestuhlut í fyrirtækinu, bæði frá innlendum og erlendum aðilum.

Arion banki lýsti því yfir í október síðastliðnum þegar fyrirtækið var sett í söluferli að markmiðið væri að kjölfestufjárfestir, sem færi með 15-29 prósenta hlut, kæmi að fyrirtækinu og veitti því forystu til lengri tíma.

Ekki fengust upplýsingar hjá Arion banka um nöfn þeirra sem gerðu tilboð eða hvers lenskir hinir erlendu tilboðsgjafar eru. Bankinn er bundinn trúnaði þar sem um óskuldbindandi tilboð er að ræða. Hins vegar verður upplýst um næstu þrep söluferlisins í næstu viku.

Hagar voru dæmdir í Hæstarétti síðastliðinn fimmtudag til að greiða 315 milljónir króna sekt vegna samkeppnisbrota. Er sektin sú hæsta sem sett hefur verið á fyrirtæki vegna misnotkunar á markaðsráðandi stöðu. Eftir þetta hófust umræður á varaldarvefnum um stöðu forstjóra fyrirtækisins, Finns Árnasonar.

Fréttastofa óskaði eftir upplýsingum hjá Arion banka hvort til stæði að gera breytingar á stjórnendateymi Haga, en bankinn á sína fulltrúa í stjórn fyrirtækisins.

Iða Brá Benediktsdóttir, talsmaður Arion banka, segir í svari við fyrirspurn fréttastofu að Arion banki beri traust til núverandi stjórnenda Haga til að reka félagið vel.