Telur ólíklegt að Fitch lækki lánshæfiseinkunn Íslands

Í Morgunkorni greiningarinnar segir að nýlegur dómur Hæstaréttar um ólögmæti gengistryggða lána mun líklega hafa neikvæð áhrif á stöðugleika fjármálakerfisins hér á landi, fjármál hins opinbera sem og þá viðleitni yfirvalda að draga úr gjaldeyrishöftum. Þetta er mat Paul Rawkins, aðstoðarframkvæmdastjóra greiningarteymis lánshæfismatsfyrirtækisins Fitch í Lundúnum, en viðtal við hann var birt á fréttaveitunni Bloomberg í gærmorgun.

Að hans mati er líklegt að dómurinn komi til með að seinka efnahagslegum bata hér á landi. Af ummælum hans að dæma er það mat Fitch að dómurinn hefur ekki góð áhrif á lánshæfi ríkissjóðs. Kemur það ekki á óvart enda hefur óvissan í efnahagsmálum aukist með tilkomu dómsins. Ekkert hefur heyrst frá matsfyrirtækinu Fitch fyrr en nú frá því það lækkaði einkunnir ríkissjóðs fyrir erlendar skuldbindingar niður í spákaupmennskuflokk, þ.e. BB+, í kjölfar ákvörðun forseta Íslands um að vísa Icesave-samningnum til þjóðaratkvæðagreiðslu sem átti sér stað í byrjun janúar.

„Þrátt fyrir ummælin Rawkins sem greint er frá hér á ofan eigum við ekki von á að fyrirtækið komi til með að breyta lánshæfiseinkunnum ríkissjóðs í bráð og jafnvel þrátt fyrir að einkunnir ríkissjóðs eru á neikvæðum horfum í bókum fyrirtækisins," segir í Morgunkorninu.

„Í raun hefur margt jákvætt áunnist hér á landi frá því fyrirtækið lækkaði einkunnir ríkissjóðs. Má hér nefna að erlenda skuldastaða þjóðarbúsins hefur batnað, aðgengi landsins að erlendu lánsfé hefur aukist, verðbólgan hefur hjaðnað og gengi krónunnar hefur styrkst.

Teljum við því ólíklegt að Fitch lækki lánshæfiseinkunn ríkissjóðs enn frekar nema verulegt bakslag verði í efnahagsframvindunni og þeirri áætlun sem ríkisstjórnin og Alþjóðagjaldeyrissjóðurinn vinna nú eftir við uppbyggingu efnahagslífsins."