Spáir verðhjöðnun í júlí, verðbólgan lækkar í 5,2%

Greiningardeild Arion banka gerir ráð fyrir 0,25% verðhjöðnun í júlí sem mun lækka 12 mánaða verðbólgu niður í 5,2%, úr 5,7%.

„Helsta ástæðan fyrir því að við spáum lækkun er tímabundin áhrif frá sumarútsölum þennan mánuð. En þar fyrir utan hefur styrking krónunnar sl. mánuði dregið niður ýmsa liði vísitölunnar. Á hinn bóginn mun eldsneytisverð hafa áhrif til hækkunar," segir í Markaðspunktum greiningarinnar.

Helstu atriði til grundvallar spá greiningarnnar eru að síðustu tvö ár hafa sumarútsölur á fatnaði lækkað vísitölu neysluverðs um 0,4-0,5% í júlí, og gerir greiningin ráð fyrir svipuðum áhrifum nú. Reynslan sýnir hinsvegar að útsöluáhrifin ganga að mestu til baka í ágúst og september, og verka þá til hækkunar verðlags.

Eldsneytisverð hefur hækkað frá síðustu mælingu Hagstofunnar og jafngildir hækkunin um 0,15% áhrifum til hækkunar á vísitölu neysluverðs.

Af öðrum áhrifaþáttum verðbólgunnar má nefna að þótt verð á nýjum bílum hafi lækkað töluvert í júní, þá komu áhrif þess ekki fram í vísitölu neysluverðs. Hugsanlegt er að áhrifin komi að einhverju leyti fram í júlí eða á næstu mánuðum.

Hvað horfur til lengri tíma varðar segir í Markaðspunktunum að í ágúst og september mun verðlag hækka meira en ella vegna útsöluloka, þ.e. þegar útsölur júlímánaðar ganga til baka.

„Á hinn bóginn teljum við fáa aðra verðbólguhvetjandi þætti til staðar aðra en væntanlegar gjaldskrárhækkanir orkufyrirtækja og hins opinbera. Hér verður að hafa í huga að kaupmáttur heimila er enn að dragast saman, atvinnuleysi er í hámarki og innlend eftirspurn því enn lítil.

Síðast en ekki síst hefur krónan verið að styrkjast síðastliðið hálft ár og gengisvæntingar eru því líklega jákvæðari nú en fyrir 6 mánuðum. Ólíklegt er því að verðbólgan rjúki upp meðan helstu forsendur, s.s. um stöðugt gengi, standast. Langtímaspá okkar gerir ráð fyrir að það dragi hratt úr verðbólgunni á seinni helmingi ársins.

Í lok árs gerum við ráð fyrir að tólf mánað verðbólga verði komin í kringum verðbólgumarkmið Seðlabankans. Óvissan til skemmri tíma í spá okkar snýr einna helst að húsnæðisliðnum en erfitt hefur reynst að spá fyrir um þróun þess á undanförnu," segir í Markaðspunktunum.