Ráðherra krefur skilanefndir um upplýsingar

Árni Páll Árnason, félagsmálaráðherra, vill að skilanefndir gömlu bankanna upplýsi um fjölda þeirra mála sem þær hafa vísað til sérstaks saksóknara. Ljóst sé að skilanefnd Glitnis hafi einungis sent mál eigenda og stjórnenda Glitnis, sem komst í hámæli í síðustu viku, til sérstaks saksóknara vegna þrýstings stjórnvalda. Þetta kom fram í máli Árna Páls í þættinum Sprengisandur á Bylgjunni fyrr í dag.

„Ég held að það sé eðlilegt að gera þá kröfu til skilanefndanna að þær gefi okkur sundurliðaðar upplýsingar um það hversu mörg mál hver og ein þeirra hefur sent til sérstaks saksóknara. Ég held að í þessu samhengi verði við að horfa sérstaklega á Landabankann. Þann banka sem mun valda íslenskum almenningi mestu tjóni," sagði Árni Páll og vísaði til Icesave málsins. Hann sagði að skilanefndirnar verði að gera ítarlega grein fyrir þessum atriðum. Glitnismálið sanni það.