Enn dæmir héraðsdómur gengistryggingu ólögmæta

Í beiðni kemur fram að NBI telur sig eiga kröfur að höfuðstól tæplega 860 milljón krónur... á hendur Þráni ehf.. Er vísað til fimm lánssamninga sem gerðir hafi verið á árunum 2006 og 2007. Eru þeir sagðir hafa verið upphaflega að jafnvirði 357.5 milljónir króna, en í ýmsum myntum. Að beiðni NBI var reynt að kyrrsetja eignir Þráins ehf. til tryggingar kröfunni hinn 9. desember 2009, en gerðinni var lokið sem árangurslausri.

Í dóminum segir að Þráinn ehf. telur að óheimilt sé að tengja lán í íslenskum krónum við breytingar á gengi erlendra gjaldmiðla. Líta verði til þess að hann hafi fengið afhentar íslenskar krónur. NBI byrji á öfugum enda í innheimtu sinni. Hann ætti fyrst að fá skorið úr um lögmæti þeirra lánasamninga sem um ræðir. NBI beri sönnunarbyrðina fyrir því að lánin hafi verið veitt í erlendum gjaldmiðli. Áður en sú sönnun sé færð fram sé ekki tímabært að kveða upp gjaldþrotaúrskurð.

Dómari tekur undir sjónarmið Þráins ehf. um lögmæti gengistryggingarinnar og vísar þar í annan dóm sem nýlega féll í Héraðsdómi og nú er til meðferðar í Hæstarétti.

Í dóminum segir: „ Að þessu athuguðu verður að miða við að upphaflegur höfuðstóll skulda varnaraðila hafi verið 357.500.000 krónur og að hann hafi ekki hækkað. Varnaraðili telur verðmæti eigna sinna, sem sóknaraðili eigi veðrétt í, nema rúmlega 600 milljónum króna.

Þá segir hann á yfirlitsblaði er hann lagði fram að sóknaraðili hafi metið verðmæti eignanna 474 milljónir króna. Þessu var ekki mótmælt í málflutningi. Ætla verður að krafa sóknaraðila hafi hækkað frá því að lánin voru veitt, en eins og málið er reifað hér fyrir dómi er ekki unnt að áætla með viðunandi nákvæmni heildarfjárhæð."

Dómurinn hafnar sumsé gjaldþrotabeiðninni og gerir NBI jafnframt að greiða Þráini ehf. 300 þúsund í málskostnað.