Ekkert formlegt tilboð komið í Iceland, margir áhugasamir

Erlendur fjárfestingarsjóður sem lýst hafði yfir áhuga á að greiða jafnvirði 249 milljarða króna fyrir Iceland Foods verslanakeðjuna, hefur ekki gert formlegt tilboð ennþá. Það hefði þýtt tæplega 167 milljarða króna fyrir hlut skilanefndar Landsbankans í fyrirtækinu.

Eins og Fréttastofa greindi frá nýlega hafði erlendur fjárfestingarsjóður lýst yfir áhuga á að kaupa verslanakeðjuna Iceland Foods, en sem er að stærstum hluta í eigu skilanefndar Landsbankans. Páll Benediktsson, talsmaður skilanefndarinnar, segir að ekki hafi átt sér stað formlegar viðræður milli sjóðsins og skilanefndarinnar vegna eignarhlutarins í Iceland Foods. Þá hafi ekkert tilboð borist frá sjóðnum ennþá.

Miðað við þær verðhugmyndir sem komu fram í samskiptum fulltrúa sjóðsins við starfsmenn skilanefndarinnar verðlagði sjóðurinn fyrirtækið á 1,4 milljarða punda, jafnvirði 249 milljarða króna. Það jafngildir því að 67 prósenta hlutur skilanefndar Landsbankans sé tæplega 167 milljarða króna virði, en þetta eru fjármunir sem fara beint upp í forgangskröfur í þrotabúið, þ.e kröfur breskra og hollenskra sparifjáreigenda vegna Icesave-reikninga Landsbankans.

Rekstur Iceland Foods gengur vel en Baldvin Valtýsson, fyrrverandi yfirmaður útibús Landsbankans í Lundúnum, líkti fyrirtækinu við stóra „peningamaskínu" í blaðaviðtali hinn 22. janúar á þessu ári.

Sem kunnugt er gerði Malcolm Walker, sem ásamt öðrum lykilstjórnendum Iceland Foods heldur utan um 23 prósenta hlut í fyrirtækinu, tilboð í hlut Landsbankans en Walker verðlagði fyrirtækið í heild sinni á milljarð punda, jafnvirði 178 milljarða króna. Því tilboði var synjað af skilanefnd Landsbankans.

Að sögn Páls Benediktssonar, talsmanns skilanefndarinnar, er hluturinn í Iceland Foods ekki í söluferli þó fjölmargir hafi sýnt fyrirtækinu áhuga.