Eimskip gerir rammasamning við Ríkiskaup

Í tilkynningu segir að samningurinn felur í sér innanlandsflutninga fyrir ríkisstofnanir um land allt sem nær til allra vöruflutninga innanlands á öllum áætlunarleiðum Eimskips Flytjanda og samstarfsaðila Flytjanda. Landflutningar Samskip voru áður með þennan samning.

Eimskip Flytjandi rekur öflugt þjónustunet í flutningum á Íslandi með þjónustumiðstöðvar í öllum landshlutum og alls 80 afgreiðslustaði. Stærstu Þjónustumiðstöðvarnar eru á Akureyri, Ísafirði, Reyðarfirði, Egilsstöðum, Neskaupstað, Selfossi og í Vestmannaeyjum.

Hjá Eimskip Flytjanda starfa um 180 starfsmenn, auk starfsmanna samstarfsaðila sem eru vel á annað hundrað.

" Það er ánægjulegt að Ríkiskaup hefur valið Eimskip Flytjanda sem aðal samstarfsaðila í flutningum innanlands og það er ákveðin viðurkenning fyrir þjónustu Flytjanda og starfsfólk þess," segir Guðmundur Nikulasson framkvæmdastjóri Eimskips Innanlands í tilkynningunni.