IFS greining spáir myndarlegri vaxtalækkun

Stýrivaxtafundur Seðlabanka Íslands verður haldinn næsta miðvikudag, 8. desember. IFS Greining gerir ráð fyrir 75 punkta lækkun stýrivaxta (veðlánavaxta) sem stæðu þá í 4,75%. Gangi spáin eftir verða vextir á viðskiptareikningum lánastofnana 3,25% og hámarksvextir á 28 daga innstæðubréfum 4,5%.

Í tilkynningu segir að ein helstu rökin fyrir stýrivaxtalækkun í næstu viku eru hversu hratt verðbólgan hefur hjaðnað. Hún hefur hjaðnað hraðar en flestir bjuggust við og er 12 mánaða verðbólga komin niður í 2,6% í nóvember.

Nú er svo komið að raunstýrivextir eru orðnir of háir miðað við að fjárfestingar eru í lágmarki og framleiðsluslaki er mikill, atvinnuleysi fer hækkandi, verðbólga er á hraðri niðurleið og verðbólguvæntingar sömuleiðis. Einnig kæmi vaxtalækkun sér vel fyrir skuldsett heimili og fyrirtæki.

Raunstýrivextir á Íslandi (+2,9%) eru orðnir töluvert hærri en á evrusvæðinu (-0,9%) og í BNA (-0,95%) sem stenst ekki til lengdar. Í ræðu Más Guðmundssonar seðlabankastjóra síðasta fimmtudag kom fram að „virkir raunstýrivextir á bilinu 2-2,5% væru einfaldlega of háir eftir að markmið um gengisstöðugleika og verðbólgu hafa náðst."

Sé horft til orða Más ætti að vera svigrúm 8. desember fyrir jafn mikla vaxtalækkun og síðustu tvo vaxtaákvörðunardaga, að mati IFS greiningar.