Hlutur Björgólfs Thors í Verne Holdings minnkar um helming

Skúli Helgason fjallar um málið í grein á vefsíðunni pressan.is. Þar segir að á fundi iðnaðarnefndar Alþingis í morgun upplýsti Vilhjálmur Þorsteinsson stjórnarformaður Verne Holdings (móðurfélags Verne Global) að Wellcome Trust, góðgerðarsjóðurinn breski verði ráðandi aðili í verkefninu og muni fjármagna það héðan í frá.

„Hlutur fyrri hluthafa minnkar því verulega og má ætla að hann dragist saman um helming eða svo. Æskilegt væri að allar upplýsingar um samsetningu eigendahópsins lægju fyrir hið fyrsta en um þær ríkir trúnaður á þessu stigi máls.

Wellcome Trust hefur tengsl við öfluga kaupendur gagnaversþjónustu m.a. í Bandaríkjunum og standa vonir til þess að með aðkomu sjóðsins opnist leið fyrir stóra viðskiptasamninga, því verkefnið stendur jú og fellur með því að samningar takist við þriðju aðila sem tilbúnir eru að kaupa þjónustu gagnaversins," segir í grein Skúla.

Þar kemur einnig fram að iðnaðarnefnd sendir nú frumvarpið um fjárfestingarsamninginn til umsagnar og að því búnu mun nefndin taka málið til meðferðar. Ljóst er að samningurinn er mikilvæg forsenda þess að verkefnið geti orðið að veruleika, því hann tryggir ákveðinn fyrirsjáanleika varðandi almennt rekstrarumhverfi verkefnisins næstu 20 árin.

Sú ívilnun sem felst í samningnum er hófleg, hefur verið áætluð 0,7% af heildarfjárfestingunni en hún er nauðsynleg til að skapa stöðugleika og traust á Íslandi sem vænlegum fjárfestingarkosti. í þessum geira.

„Það er reyndar eitt helsta verkefni stjórnmálanna í dag, að endurvekja traust á Íslandi eftir bankahrunið og það væri mikill fengur fyrir íslenskt atvinnulíf að geta bætt við nýjum geira, sem er í senn vistvæn, tryggir fjölda vel menntaðs fólks störf í geira með mikla vaxtarmöguleika og skapar öflugt viðnám gegn atvinnuleysi á því svæði landsins þar sem atvinnuleysistölur eru hæstar," segir Skúli.