FME skipar bráðabirgðastjórn yfir Avant

Fjármálaeftirlitið (FME) hefur orðið við beiðni Avant hf. um að skipa félaginu bráðabirgðastjórn á grundvelli laga um fjármálafyrirtæki.

Bráðabirgðastjórn Avant hf. skipa: Friðjón Örn Friðjónsson, hrl., formaður, Hulda Rós Rúriksdóttir, hrl. og Ljósbrá H. Baldursdóttir, lögg. Endurskoðandi.

Á vefsíðu FME segir að samkvæmt lögunum getur stjórn fjármálafyrirtækis, sem á í þeim fjárhags- og rekstrarerfiðleikum að líkur séu til að það geti ekki staðið við skuldbindingar sínar eða uppfyllt kröfur um lágmark eigin fjár, leitað eftir því við Fjármálaeftirlitið að það taki við ráðum yfir fyrirtækinu. Við þær aðstæður getur Fjármálaeftirlitið skipað fjármálafyrirtækinu bráðabirgðastjórn.

Bráðabirgðastjórnin fer ein með sömu heimildir að lögum og eftir samþykktum Avant hf. og stjórn og hluthafafundur hefði annars haft á hendi.