Vaxtakjör á ríkisvíxlum þau bestu frá hruninu 2008

Góð þátttaka var í ríkisvíxlaútboðinu sem haldið var hjá Lánamálum ríkisins í gær. Þannig bárust alls 43 gild tilboð í ríkisvíxlaflokkinn RIKV 10 1115 að fjárhæð 23,9 milljarðar kr. að nafnverði. Ákveðið var að taka tilboðum fyrir 22,1 milljarða kr. að nafnverði á 5,49% flötum vöxtum.

Í Morgunkorni greiningar Íslandsbanka segir að vaxtakjör ríkissjóðs voru þau bestu frá því að hann hóf útgáfu á víxlum í kjölfar bankahrunsins og má hann því vel við una miðað við þessa niðurstöðu.

Á gjalddaga á morgun eru 20 milljarðar kr. af ríkisvíxlum og eftir útboðið í gær hækkar því heildarstabbi útistandandi ríkisvíxla úr rúmum 72,3 milljörðum kr. í rúma 74,4 milljarða kr.

Að svo stöddu liggja ekki fyrir upplýsingar um af hvaða tagi kaupendur ríkisvíxlanna voru í gær, en í víxlaútboðinu sem fór fram í síðasta mánuði voru verðbréfasjóðir fyrirferðarmestir og keyptu um 39% seldra víxla.

Erlendir aðilar létu minna fyrir sér fara í þessu sama útboði en þeir hafa gert að undanförnu og keyptu einungis fimmtung af seldum víxlum. Þó er ekki hægt að útiloka að erlendir aðilar hafi verið fyrirferðamiklir í víxlaútboðinu sem haldið var í gær en þeir höfðu upphaflega keypt 54% af seldum víxlum í þeim flokki sem er á gjalddaga á morgun.

Samkvæmt Markaðsupplýsingum sem Lánamál sendu frá sér síðastliðinn föstudag nam eignarhlutdeild erlendra aðila af útistandi ríkisvíxlum 67% í lok maí.