Afkoma Íslandsbanka jákvæð um rúma átta milljarða

Afkoma Íslandsbanka á fyrsta árshluta 2010 var samkvæmt könnuðum árshlutareikningi jákvæð um 8,3 milljarða króna og er tekjuskattur tímabilsins áætlaður 2.347 milljónir króna. Frá þessu er greint á heimasíðu bankans en eiginfjárhlutfall hans var 21,5% sem er talsvert hærra en það 16% lágmark sem Fjármálaeftirlitið hefur sett bankanum. Arðsemi eigin fjár var 17,1%.

Birna Einarsdóttir, bankastjóri Íslandsbanka segir að rekstur bankans hafi gengið vel á fyrri helmingi ársins og verið nokkuð í takt við fyrri áætlanir. „Eiginfjárstaða bankans er afar sterk eða 21,5% sem er vel yfir 16% lágmarkskröfu Fjármálaeftirlitsins. Það er ljóst að bankinn hefur þannig allar forsendur til að koma í auknu mæli að fjármögnun atvinnulífsins á Íslandi."

Birna bendir á að vissulega hafi réttaróvissa um lögmæti og vaxtakjör lána í erlendri mynt sett mark sitt á uppgjörsvinnu bankans og hefur Íslandsbanki gert úttekt á hugsanlegum áhrifum ólíkra niðurstaðna í því máli. Hún segir að sú úttekt hafi leitt í ljós ef öll lán í erlendri mynt verða dæmd ólögleg geti höggið á eiginfjárgrunn bankans orðið verulegt.

„Verði það niðurstaðan mun Íslandsbanki eigi að síður vera með eiginfjárhlutfall yfir 12% sem er vel yfir lögbundnu lágmarki. Slík niðurstaða myndi þó skerða verulega möguleika bankans til að þjónusta heimili og fyrirtæki og veita fjármunum til fjárfestinga og þar með taka þátt í endurreisn atvinnulífsins."