Fullvissa sig um fjármögnunina

Ekki hefur enn verið ákveðinn fundardagur fyrir stjórn Alþjóðagjaldeyrissjóðsins (AGS). Gert er ráð fyrir að þriðja endurskoðun efnahagsáætlunar Íslands og sjóðsins verði tekin fyrir á fundi stjórnarinnar í þessum mánuði.

„Efnahagsáætlun Íslands er fjármögnuð að hluta af AGS og einnig af öðrum löndum og við þurfum að fullvissa okkur um að áætlunin sé fjármögnuð að fullu," sagði Caroline Atkinson, forstöðumaður ytri samskipta hjá sjóðnum, á reglubundnum upplýsingafundi í gær. „Það er nokkuð sem þarf að endurmeta eftir því sem haldið er áfram. Ég er því ekki að tala um hliðarviðræður við Bretland og Holland," sagði hún. - óká