Glitnir vill 1900 milljónir frá norsku sjávarútvegsfyrirtæki

Skilanefnd Glitnis hefur stefnt norska sjávarútvegsfyrirtækinu Aker Seafoods og krefst 99 milljóna norskra króna eða sem nemur um 1900 milljónum íslenskra króna. Krafan er vegna vaxta- og gjaldmiðlaskiptasamnings sem gerður var árið 2005, að því er fram kemur á norska viðskiptavefnum e24.no. Aker Seafoods hafnar kröfu Glitnis og segir að samningnum við Glitni hafi verið rift árið 2008.

Eins og kunnugt er ákvað ríkisstjórn Íslands og Seðlabankinn að taka yfir 75% hlut í Glitni í september 2008. Einungis örfáum dögum síðar tók skilanefnd yfir rekstur bankans samkvæmt neyðarlögum.

Árni Tómasson, formaður skilanefndar Glitnis, og Steinunn Guðbjartsdóttir, formaður slitastjórnar, voru bæði upptekin á fundi þegar Vísir reyndi að ná tali af þeim í morgun.