Iceland mun standa undir fjórðungi af Icesave skuldinni

Auðvelt er að reikna úr að Iceland verslunarkeðjan ein og sér muni standa undir fjórðungi af Icesave skuld Íslands.

Mikill áhugi virðist vera á að kaupa Iceland verslunarkeðjuna í Bretlandi enda hefur hún blómstrað sem lágvöruverðsverslun í kreppunni í Bretlandi undanfarin tvö ár. Methagnaður hefur verið á rekstrinum og nam hann 22 milljörðum króna á síðasta ári.

Malcolm Walker stofnandi Iceland bauðst til að kaupa keðjuna á 200 milljarða króna og annar fjárfestir er reiðubúinn að borga 250 milljarða króna fyrir Iceland.

Verði keðjan seld fyrir upphæðir sem hér um ræðir mun söluverðið eitt og sér standa undir fjórðungi af Icesave skuld Íslands en skilanefnd Landsbankans heldur á um 69% eignarhlut í Iceland.

Heildarskuldin nemur 3,2 milljörðum punda og ef Iceland verður seld fyrir 200 til 250 milljarða kr. mun keðjan gefa af sér um 800 milljónir punda upp í Icesave skuldina.