365 miðlar töpuðu 344 milljónum í fyrra

Fjölmiðlafyrirtækið 365 miðlar ehf. tapaði 344 milljónum kr. á síðasta ári. Samkvæmt efnahagsreikningi nam eigið fé félagsins 773 milljónum kr. í árslok 2009 og eiginfjárhlutfall 9,3%. Þá nam handbært fé félagsins 235 milljónum kr.

Þetta kemur fram í tilkynningu frá félaginu. Þar segir að í tengslum við skil á ársreikningi 365 miðla ehf. fyrir árið 2009 til fyrirtækjaskrár Ríkisskattstjóra í dag, þá vill félagið vekja athygli á þeirri breytingu sem orðið hefur á fjárhagsstöðu þess á árinu 2010.

Samkvæmt ársreikningi 2009 nam heildarvelta félagsins 7.966 milljónum kr. og EBITDA hagnaður nam 808 milljónum kr. á árinu. Afskriftir og fjármagnsliðir námu 1.152 milljónum kr. á árinu og tap ársins því 344 milljónir kr.

Fjárhagsstaða félagsins hefur styrkst verulega á árinu 2010. Í lok mars 2010 var hlutafé félagsins aukið um 1.000 milljónir kr. og var aukningunni að miklu leyti ráðstafað til niðurgreiðslu skulda í byrjun apríl.

Samkvæmt rekstrarreikningi fyrir fyrstu 9 mánuði ársins 2010 þá nam heildarvelta félagsins um 6.000 milljónum kr. og EBITDA hagnaður 594 milljónir kr. á sama tíma, sem er alveg í takt við áætlanir félagsins. Afskriftir og fjármagnsliðir námu 508 milljónum kr. og hagnaður tímabilsins því 86 milljónir kr.

Samkvæmt efnahagsreikningi nemur eigið fé félagsins nú 1.846 milljónir kr. og er eiginfjárhlutfall 20,3%. Veltufjárhlutfall er 1,02 og handbært fé félagsins nemur 735 milljónir kr. í lok september 2010.

365 miðlar ehf. reka Stöð 2, Vísir.is, Bylgjuna og Fréttablaðið.