Rekstur Landsbanka og Arion óviðunandi

„Til lengri tíma litið er þetta ekki afkoma af kjarnastarfsemi sem menn væru sáttir við. En það verður að hafa hugfast að verið er að vinna úr erfiðum úrlausnarefnum. Mér finnst skýrslan ekki gefa tilefni til svartsýni," segir Steingrímur J. Sigfússon, fjármálaráðherra.

Arðsemi Landsbankans og Arion banka er langt undir eðlilegri arðsemiskröfu ríkisins og grípa verður til aðgerða þess vegna, segir í fyrstu matsskýrslu Bankasýslu ríkisins. Þar segir jafnframt að of margt fólk starfi nú í íslenska fjármálakerfinu en hlutfall starfsmanna í fjármálaþjónustu á Íslandi er með því hæsta sem þekkist.

Steingrímur segir skýrsluna gagnlega og hann á von á tillögum frá Bankasýslunni um aðgerðir til bóta, enda sé það hennar verkefni. Um stærð bankakerfisins segir Steingrímur ljóst að í alþjóðlegum samanburði sé kerfið stórt. „Flestir búast samt við að þessar tölur muni taka breytingum á næstu misserum og árum." Hann telur að staða Landsbankans sé skiljanleg miðað við þau verkefni sem bankinn hefur með höndum og lúta að fyrirtækjum og útflutningsgreinunum. Engin áform eru um að hrófla við stöðu ríkisins í bankanum, að hans sögn.

Ríkið á í öllum stóru bönkunum þremur, mest í Landsbankanum, eða 81,3 prósent, þrettán prósent í Arion banka og fimm prósent í Íslandsbanka. Alls eru 190 milljarðar króna af fjármunum ríkisins bundnir í bönkunum.

Útreikningar Bankasýslunnar sýna að Íslandsbanki stendur langbest að vígi, með 28,7 til 32,5 prósenta arðsemi af grunnrekstri. Sama tala hjá Arion banka er 3,8 til 7,9 prósent og einungis 2,4 til 6,4 prósent hjá Landsbankanum. Eðlileg arðsemiskrafa er metin ríflega fimmtán prósent.

Elín Jónsdóttir, forstjóri Bankasýslu ríkisins, vill ekki tjá sig um það til hvaða aðgerða hún telur að þurfi að grípa eigi arðbærnimarkmið bankanna að nást.

- sh, shá