Brynjólfur Bjarnason hættir hjá Skiptum

Brynjólfur Bjarnason, forstjóri Skipta, tilkynnti nýrri stjórn Exista, eiganda Skipta, í dag að hann segði starfi sínu lausu frá og með deginum í dag. Að ósk eigenda mun hann stýra félaginu þangað til ákvarðanir hafa verið teknar um framhaldið. Brynjólfur tók við starfi forstjóra Símans árið 2002 og við stofnun Skipta árið 2007 varð hann forstjóri þess félags.

„Brynjólfur hefur unnið frábært starf hjá Skiptum og Símanum undanfarin ár og það er mikill missir að honum. Fyrirtækið hefur dafnað undir hans stjórn og það sýnir styrk rekstrarins að á þessum tímamótum stefnir eiginfjárhlutfall fyrirtækisins í 33% og það hefur staðið við allar sínar skuldbindingar gagnvart lánardrottnum, þrátt fyrir þau áföll sem dunið hafa yfir íslenskt samfélag. Fyrir hönd stjórnar þakka ég honum kærlega fyrir samstarfið," segir Rannveig Rist, stjórnarformaður Skipta, í tilkynningu vegna málsins.

Brynjólfur Bjarnason segir í tilkynningunni að ástæðan fyrir uppsögn sinni sé fyrst og fremst sú að nú hafi orðið kaflaskil hjá fyrirtækinu. Nýir eigendur hafi tekið við og hann telji við hæfi að ný stjórn hafi óbundnar hendur við að skipa málum fyrirtækisins.