Tap MP banka 1,9 milljarðar á fyrri helming ársins

MP banki skilaði 1,9 milljarða kr. tapi á fyrstu sex mánuðum ársins. Þetta kemur fram á vefsíðu bankans Þar sem greint er frá stöðu hans í ljósi fregna að undanförnu um að bankinn uppfylli ekki skilyrði Fjármálaeftirlitsins um eiginfjárhlutfall.

Á vefsíðunni segir að afkoma félagsins á fyrri helmingi 2010 sé óviðunandi og nam tap bankans tæplega 1,9 milljörðum kr. Þar vegur þyngst styrking krónunar, niðurfærsla á lánum í erlendri mynt og gjaldfærsla að fjárhæð 750 miljónum kr. vegna sáttar í uppgjörsmáli bankans við einn af föllnu viðskiptabönkunum.

Þrátt fyrir áföll á fyrri helmingi ársins er fjárhagstaða bankans góð, eigið fé félagsins er 3,2 milljarðar kr. og heildareignir tæplega 62,4 milljarðar kr. Reiknað eiginfjárhlutfall bankans samkvæmt lögum um fjármálafyrirtæki er 9,2% en má lægst vera 8%, að því er segir á vefsíðunni.

Lausafjárstaða bankans var mjög sterk í lok tímabilsins eða 32,2 milljarðar kr. Þar vega þyngst innstæðubréf, innstæður í Seðlabanka Íslands og eignir í íslenskum ríkistryggðum skuldabréfum. Óbundin innlán námu á þessum tíma 31,7 milljörðum kr.

Viðskiptavinum fjölgaði um 33% á fyrstu 6 mánuðum ársins. Yfir 90% viðskiptavina bankans eru ánægðir með þjónustu bankans og yfir 80% viðskiptavina myndu mæla með bankanum við vini og vandamenn samkvæmt þjónustukönnun.

MP banki er nú stærsti aðilinn á íslenskum verðbréfamarkaði samkvæmt Kauphöll Íslands og hefur markaðshlutdeild verið í stöðugum vexti frá bankahruninu 2008. Rekstur starfsstöðvar bankans í Litháen skilaði hagnaði fyrri hluta ársins.