Dæmdur Rússi meðal stóreigenda Kaupþings

Í skýrslunni segir: „Tæplega 30 milljarða samningur var gerður í ágúst við Gallagher Holdings Limited, sem var í eigu rússneska kaupsýslumannsins Alisher Usmanov. Undirliggjandi hlutabréf í þeim viðskiptum var Mmc Norilsk Adr, alþjóðlegt námufyrirtæki upprunnið í Rússlandi. Samkvæmt lánaumsókn í Kaupþingi 24. september 2008 er Usmanov sagður eigandi 1,48% hlutar í Kaupþingi en sú lánaumsókn sneri að láni til kaupa tæplega 10% hlutar í finnska tryggingafélaginu Sampo.

Fram kemur í skýrslunni að samtals hafi Usmanov skuldað íslenskum bönkum 237 miljónir evra eða ríflega 40 milljarða kr. en þessi upphæð er ekki sundurgreind milli einstakra banka. Samkvæmt framansögðu virðist megnið af skuldinni vera við Kaupþing.

Í umfjöllun Wikipedia um Usmanov kemur fram að hann sat um sex ára skeið á níunda áratug síðustu aldar í fangelsi í Uzbekistan í Rússlandi eftir að hafa verið dæmdur fyrir mútur og fjárkúgun. Dómur hans hljóðaði upp á átta ára harða refsivist í þrælkunarbúðum. Hæstiréttur Uzbekistan snéri þessum dómi við árið 2000 og sagði að málaferlin hefðu verið tilbúningur. Þá var Usmanov á hraðri leið með að verða einn af auðugustu mönnum í heiminum.

Í viðskiptaheimi Rússlands var Usmanov þekktur sem harðhaus Rússlands eða „the hard man of Russia" eins og það er orðað á Wikipedia. Dómurinn í Uzbekistan, þar sem Usmanov er fæddur, er ekki í fyrsta sinn sem hann kynnist málaferlum. Árið 2007 kemur nafn hans fram í málskjölum í Denver í Bandaríkjunum þar sem hann er sakaður um fjársvik, skjalafals o.fl. í lagadeilum um eina af gjöfulustu demantanámu í heimi. De Beers höfðaði mál um eignaréttinn á námunni gegn Arkhangel Diamond Corp. þar sem Usmanov sat sem varaformaður stjórnar félagsins.

Usmanov er samkvæmt Forbes einn af auðugustu mönnum Rússlands og í 100. sæti yfir auðugustu menn heimsins en auður hans er metinn á 7,2 milljarða dollara. Usmanov var einn af þeim sem urðu ofurríkir á nær einni nóttu í stjórnartíð Boris Jeltsín á tíunda áratug síðustu aldar þegar rússnesku ríkisfyrirtækin voru einkavædd. Auður hans byggist að stórum hluta á námu- og málmvinnslufyrirtækjum auk þess að hann á stóran hlut í fjárfestingararmi Gazprom olíufélagsins.

Á síðustu árum hefur Usmanov verið mikið í sviðsljósinu í Bretlandi sem einn af stærstu eigendum úrvalsdeildarliðsins Arsenal. Hann hóf að kaupa hluti í Arsenal árið 2007 og á nú tæplega 30% í liðinu. Áhangendur Arsenal eru lítt hrifnir af þessum eigenda liðsins.