Aflaverðmætið jókst um 9% milli ára í janúar

Þetta kemur fram á vefsíðu Hagstofunnar. Þar segir að aflaverðmæti botnfisks var 6,8 milljarðar kr. og jókst um 16% frá janúar í fyrra þegar aflaverðmætið nam tæpum 5,9 milljörðum kr. Verðmæti þorskafla var um 4,1 milljarðar kr. og jókst um 21% frá fyrra ári.

Aflaverðmæti ýsu nam tæpum 1,3 milljarði kr. og jókst um 16% en verðmæti karfaaflans nam tæpum 500 milljónum kr., sem er 15% samdráttur frá janúar 2009. Verðmæti ufsaaflans jókst um 29% milli ára í 372 milljónir kr.

Verðmæti uppsjávarafla nam 657 milljónum króna í janúar 2010, sem er um 32% samdráttur frá fyrra ári. Aflaverðmæti flatfisksafla nam 528 milljónum, sem er 5% aukning miðað við janúar 2009.

Verðmæti afla sem seldur er í beinni sölu útgerða til vinnslu innanlands nam 3,7 milljörðum króna í janúar og jókst um 5% miðað við janúar 2009. Verðmæti afla sem keyptur er á markaði til vinnslu innanlands jókst um 39% milli ára og var um 2 milljarðar kr. í janúar 2010.

Aflaverðmæti sjófrystingar nam 1,6 milljarði kr. í janúar og jókst um 46% milli ára en verðmæti afla sem fluttur er út óunninn nam 718 milljónum kr. sem er 30% samdráttur frá janúar 2009.