Erlendum ferðamönnum fjölgaði um 1200

Um 1200 fleiri erlendir ferðamenn fóru um Leifsstöð í júlí en í sama mánuði í fyrra samkvæmt talningu Ferðamálastofu. Brottfarir erlendra gesta um Leifsstöð í júlímánuði síðastliðnum voru 83.500. Aukningin nemur 1,5% á milli ára. Mun fleiri Íslendingar eða 23% fóru utan í júlímánuði í ár en í fyrra, voru 28.500 í júlí síðastliðnum en 23.100 á síðasta ári.

Ferðamálastofa segir að þegar litið sé til einstakra markaðssvæða megi sjá verulega aukningu frá Norður-Ameríku eða um 21,2%. Tæplega 6% aukning sé frá Mið- og Suður Evrópu og muni þar mestu um fjölgun Þjóðverja sem séu 14,5% fleiri í júlímánuði í ár en í fyrra og hafi það sem af er sumri aldrei fleiri þýskir ferðamenn komið til landsins.

Norðurlandabúum hefur fækkað og má rekja þá fækkun til færri Finna og Svía. Fjöldi Norðmanna er svipaður en Dönum sem eru langfjölmennastir Norðurlandabúa í júlímánuði í ár fjölgar hins vegar nokkuð. Fjöldi Breta er svipaður og í fyrra en gestum frá öðrum löndum innan og utan Evrópu sem eru flokkuð saman undir „Annað“ fækkar um 8%.

Frá áramótum hafa 254.700 erlendir gestir farið frá landinu eða 6.400 færri en árinu áður og nemur fækkunin 2,4% milli ára.