Bagalegt að greiðslukort skuldara séu klippt

Umboðsmaður skuldara segir bagalegt að vita til þess að greiðslukort einstaklinga í greiðsluaðlögun hafi verið klippt í verslunum. Upplýsingum um skilyrði greiðsluaðlögunar verður aftur komið á framfæri til þeirra sem eiga inni umsókn.

Tæplega þrjú hundruð sóttu um greiðsluaðlögun hjá umboðsmanni skuldara í síðasta mánuði og hafa aldrei verið fleiri. Alls liggja nú fyrir um átta hundruð umsóknir. Lögum um greiðsluaðlögun var breytt í síðasta mánuði þannig að greiðslufrestur hefst nú um leið og umsókn er lögð inn. Áður þurfti fólk að bíða eftir samþykki. Eins og fram kom í fréttum stöðvar tvö í gær kom þetta nokkrum opna skjöldu en greiðsluaðlögun felur í sér að fólki er óheimilt að nota greiðslukort og stofna til skuldbindinga af nokkru tagi.

Nokkrir lentu í því að greiðslukort þeirra voru klippt í verslunum. „Því miður höfum við heyrt nokkur dæmi og þetta er og ég hef fullan skilning að þetta er bagalegt. Ég legg mikla áherslu á það að fólk leiti strax til síns viðskiptabanka og skoði hvaða lausnir eru til að forðast þetta," segir Ásta Sigrún Helgadóttir, umboðsmaður skuldara. „Við lögðum mikla áherslu á það að upplýsa fólk hvað felst íþessu og sendum öllum bréfum en ég tel mikilvægt að ítreka þetta og við ætlum að senda bréf aftur til þeirra sem eru með umsókn um greiðsluaðlögun," segir Ásta.