Skipti selja Já

Skipti hf. hafa undirritað samning um sölu á Já upplýsingaveitum ehf. Í tilkynningu frá Skiptum segir að kaupandinn sé fyrirtæki í meirihlutaeigu Auðar 1 fagfjárfestasjóðs. Kaupverð er trúnaðarmál en söluhagnaður Skipta af viðskiptunum nemur 1,3 milljörðum króna. Greitt er fyrir hlutinn með reiðufé.

„Í ágúst 2005 stofnaði Skipti sérstakt félag um starfsemi Já," segir í tilkynningu. „Símaskráin hefur verið gefin út hér á landi síðan 1906 en starfsemin hefur þróast í takt við tækninýjungar. Þannig hefur Já bætt almennri upplýsingagjöf í gegnum 118 við starfsemi sína og þróað og markaðssett vefinn Já.is, sem er ein mest sótta vefsíða á Íslandi. Já vinnur náið með öllum fjarskiptafyrirtækjum á Íslandi."

Brynjólfur Bjarnason, forstjóri Skipta segir að ákvörðunin um að gera Já að sérstakri rekstrareiningu innan Skipta hafi reynst farsæl. „Tekjur og arðsemi fyrirtækisins hafa vaxið og fyrirtækið hefur náð góðri stöðu á íslenskum markaði. Starfsfólk og stjórnendur hafa unnið frábært starf og fyrirtækið hefur breyst úr því að vera deild innan Símans í það að vera upplýsingaveitufyrirtæki sem þjónar öllum fjarskiptafyrirtækjum á Íslandi." Brynjólfur segir söluverðið mjög ásættanlegt og að það sé afar jákvætt að hagnast um 1,3 milljarða króna af fjárfestingu á þessum tímum. „Við munum nýta þá fjármuni sem fást við söluna til að styrkja fjárhagsstöðu Skipta enn frekar og greiða niður skuldir."