SÍF snuðaði kanadískan fiskverkanda

Fiskverkanda frá Nova Scotia í Kanada hafa verið dæmdir 180 þúsund dollarar, jafnvirði um 20 milljóna króna, fyrir vangreidda ráðgjafarþóknun frá Sölusambandi íslenskra fiskframleiðenda (SÍF). Sagt er frá málinu í blaðinu The Chronicle Herald.

Roger H. Smith og kona hans Gail seldu SÍF saltfiskverkunina Sans Souci Seafoods í Yarmouth árið 1997 fyrir 5,6 milljónir dollara, sem þá voru um 400 milljónir króna. SÍF gerði munnlegt samkomulag við Smith um að hann stæði ekki í samkeppni við félagið í fimm ár gegn því að hann fengi 100 þúsund dollara ráðgjafarþóknun frá félaginu árlega, að því er segir í dómi Hæstaréttar Nova Scotia frá því á miðvikudag.

Strax hafi hins vegar komið í ljós að SÍF ætlaði ekki að efna samkomulagið. Þess hafi heldur hvergi séð stað í kaupsamningnum. Dómarinn segir að fullnægjandi sannanir séu eigi að síður fyrir því að samkomulagið hafi verið gert. Hins vegar hafi Smith rofið það tveimur árum síðar með því að stofna humarvinnslu og hafi þar með fyrirgert rétti sínum til frekari greiðslna.

Smith er því talinn hafa verið snuðaður um 200 þúsund dollara, og eigi að auki inni fimm þúsund dollara í ferðakostnað vegna málarekstursins. Frá því dragast 25 þúsund dollarar sem hann fékk á sínum tíma greitt fyrir að vinna skýrslu en gerði aldrei.

SÍF er nú starfrækt undir merkjum Iceland Seafood. - sh