Kaupendur Tals með milljarða milli handanna

Sjóður undir stjórn Auðar Capital hefur keypt fjarskiptafyrirtækið Tal. Þetta er fjórða og jafnframt stærsta fjárfesting sjóðsins en fjárfestingageta hans er á þriðja milljarð króna.

Sjóðurinn heitir Auður einn og er í eigu um 20 aðila. Þeir eru Auður Capital, flestir stærstu lífeyrissjóðirnir auk efnaðra einstaklinga og stofnanafjárfesta. 3,2 milljörðum króna var safnað í sjóðinn í upphafi árs 2008.

Arna Harðardóttir, framkvæmdastjóri sjóðsins segir að sjóðurinn hafi ráðstafað litlum hluta af fjárhæðinni og hann sé ekki skuldsettur. Stjórnendur sjóðsins hafi því augun opin fyrir fjárfestingatækifærum.

Teymi skuldbatt sig til að selja 51 prósents eignarhlut sinn í Tali með sátt sem það gerði við Samkeppniseftirlitið síðastliðið sumar vegna samkeppnisbrota sem fyrirtækið varð uppvíst að sem meirihlutaeigandi í Tali.

Aðrir hlutahafar kusu að selja sömuleiðis en þeir eru NBI hf., Hermann Jónasson, forstjóri Tals, og Fjallaskarð, sem var í eigu Jóhanns Óla Guðmundssonar kaupsýslumanns.

Arna segir að með kaupunum á Tali sé horft til vaxandi fjarskiptamarkaðar. En kostnaður vegna fjarskipta sé orðinn stór hluti af útgjöldum heimila og fyrirtækja.

Ekki liggur fyrir hve lengi sjóðurinn muni eiga Tal en hin almenna stefna sé að eiga í félögum í 3-5 ár. Ekki liggja enn fyrir breytingar á rekstrinum, að sögn Örnu.

Ekki fékkst upplýst hve mörg tilboð bárust í Tal en þau voru að sögn nokkur.